Door: Jan Harbers

Op dinsdagaovend 16 meert weur der op veul plekken in Nederland applaudiseerd veur het personiel in de zörg. Nou het met de tweede golf weer malleur is in de ziekenhoezen en zörginstellingen doet die mensen nog aal heur uuterste best met gevaor veur eigen gezondheid. Ze verdient weer applaus. Warkers in de zörg, bedankt!

Maor der is meer volk wat as al die tied deurwarkt hef en waor wij ok beslist niet zunder kunt. Mensen in de winkels, waor wij gewoon eten kunt kopen, bedankt! Dank an al die mensen in de verdielcentra en de chauffeurs die der veur zörgt dat de veurraoden optied anvuld wordt. Dank an al het personiel in de broodfabrieken, de bakkerijen, de slachterijen, op de gruunteveiling, in de conservenfabriek en in de zuvel! Umdat jullie deurwarkt hebt, kwamen wij niks tekört. Bedankt boeren en tuunders daj deurgaot met elke dag melken, eerpels rooien, appels of tomaten plukken! En de leveranciers van trekkers, veevoer, zaai- en pootgoed, bedankt daj der veur zörgt dat der ok volgend jaor molken, ploegd en verbouwd kan worden.

Dank overheid, daj wegen anlegt en underholdt zodat al dizze spullen optied op de juuste plek bezörgd worden kunt! Bedankt Aa en Hunze daj deurgaon bent met het anleggen van de neie riolering. En al die mannen die bij kolde en hitte deurgungen met straoten leggen, zand mennen, ingraoven van de glasvezel, bedankt! Wichter in de kapsalon bedankt daj oes weer knipt en bedankt metwarkers van Hofsteenge en Gerrie daj zo goed oppast hebt. Hopelijk kuj gauw weer verdan. Mensen van de waoterleiding, van het gas, van het elektrisch en de telefoon, bedankt dat ik al die tied nooit zunder zat! 

En de journalisten van RTV Drenthe, van de NOS, van de kraant, bedankt daj gewoon deurgungen met oetzenden en schrieven zodat wij wussen wat of der in Nederland en de wereld gebeurde! Bedankt, krantenbezörgers en postbodes dat ik gewoon alles in de brievenbus kreeg en ok de mannen van de voelnisauto’s, bedankt daj oes niet met de rommel hebt laoten zitten.

Bedankt timmerluu, elektriciens en installateurs daj langskwamen as ’t neudig was. En net zo goed al die mensen in de industrie, bedankt daj deur deden zodat der genogt is, kleeraosie, stofzoegers, zeep, auto’s, mobieltjes, haomers en spiekers, het is der allemaol nog! 

Juffen en meesters, bedankt daj deurgaon bent met lesgeven, ok do de kinder niet naor schoel konden, daj der veur zörgt dat der in de toekomst weer een neie generaotie klaor stiet um alles dreiende te holden. En leerlingen en studenten, bedankt daj deurgaot met oe veur te bereiden op de toekomst, ok al giet dat nou aans as aj geern zollen willen. 

Underzukers die op de laboratoria al die testen underzuukt, mensen die bezig bent um medicienen te ontwikkelen, die op zuuk bent naor een vaccin, ik ken ze niet, weet niet waor of ze zit, maor evengoed bedankt veur jullie inzet! 

Bedankt bestuurders van de verieningen en stichtingen daj oetzuukt wat in dizze tied nog kan of niet kan en wat dan wies is. Bedankt Frank Kalshoven veur het idee van dizze culumn, Roelof veur het zörgen dat ieder wet wanneer e een column kan schrieven, Janniek veur het opmaoken van het sportblad!

Mien liest is best lang worden, maor is toch nog veuls te kört. Der is nog een wereld an volk gangs met wark waor wij niet zunder kunt. Laow veurzichtig wezen met mekaor; zunder mekaor bent wij nargens! 

Bedankt allemaol!